كورس التشطيبات

خلال كورس التشطيبات هيتم شرح البنود المتعلقة بـ استلام اعمال الدهانات التشطيبات اعمال المحارة والتشطيبات :بند البياض بند المبانى بند النجارة بند الكهرباء بند الالوميتال بند السباكة بند التكسيات

بند المباني

هنعرف الفروق بين أنواع الطوب المختلفة و إستخداماتها و مزايا و عيوب كل نوع و إمتى يمنع إستخدام الطوب الطفلي

هنتعلم إزاي بيتم إستلام توريد الطوب كمواصفات و عدد و احتياطات تشوينه بالموقع و إمتى يتم رفض الطوب المورد

هنعرف مقاسات الطوب المختلفة و إيه المقاسات القياسية اللي ينصح باستخدامها و إزاي بيتم حساب كمية الطوب اللي هنحتاجها في المشروع و إزاي نقدر نحدد كميات التشوينات اللي هنحتاجها لتنفيذ بند المباني من رمل و أسمنت و طوب

هنعرف يعني إيه مباني قصة الردم و إزاي نحدد أماكنها و إرتفاعاتها و إيه هي احتياطات تنفيذها

نتعلم في بند المباني إزاي بيتم تنفيذ البند في الموقع و إزاي نستلمه، و هنعرف المراحل اللي بيمر بيها البند و هنفهم إيه هو قد المباني و علاقته بالكمرات و إزاي نظبط حطه الجلسات و حطه الأعتاب للحوائط و إيه هو التشحيط و فايدته و هنعرف إزاي نقدر نحسب أبعاد الأعتاب تجنباً لشروخ تركيز الإجهادات، و هنعرف فنيات تنفيذ البند و إزاي بيتم ربط المداميك بدون حل رباط و إزاي بيتم ربط الحوائط مع الأعمدة بالكانات و الأشاير و إيه هو دور مسدس الطلقات، هنفهم يعني إيه وش الحيطه و ضهرها و يعني إيه شغل قلب يد و هنعرف يعني إيه تمليه و تكحيل العراميس و اللحامات

بند البياض

هنتعرف على العدة اللي بيستخدمها مبيض المحارة و مسمياتها، و هنعرف مواصفات تنفيذ البند و مراحله

هنفهم يعني إيه تجهيزات البياض و يعني إيه طرطشة و بؤج و أوتار و تأكيس و تربيع و زوي و يعني إيه تأميم الفتحات و يعني إيه ملو و تلييس و درع و تخشين و مس البياض، و إيه هو التلبيش و يعني إيه تربية و تعضيم البياض و الفرق بين التخشين و المس

هنعرف نسب خلط مونة البياض و إزاي نحسب كميات التشوينات اللي هنحتاجها و هنعرف خطورة خلط جبس بمونة البياض و إزاي نمنع المبيض من استخدام الجبس

هنتعلم إيه هي اكسسوارات البياض اللي بيتم استخدامها و الفرق بين السلك الشبك و السلك الفايبر و أهميتهم في منع ظهور الشروخ المحتمله

الأعمال الجبسية

هنعرف الفرق بين المونه الأسمنتيه و المونه الجبسية و مونه التمعيض و استخداماتهم و إيه هي التشكيلات و الديكورات اللي بنستخدم فيها الجبس.

هنعرف إيه هو المصيص و استخداماته و الأسقف الساقطه و السرر و الكرانيش و الحليات و العراميس و البانوهات و الكوابيل و التيجان و البرامق و طرق تنفيذهم و الفرق بين فرم القوالب و فرم التمشيات و مزايا و عيوب كل طريقة، و هنفهم ليه لا ينصح باستخدام الجبس في الواجهات و إيه هي البدايل.

هنتعرف على بند الجيبسوم بورد و استخداماته في عمل الأسقف المعلقه و الحوائط و الديكورات و قد إيه هو بند مهم و شائع الإستخدام، و هنتعلم إزاي بيتم تنفيذ بيوت النور و بيوت الستاير و ديكورات الأسقف و الحوائط و إيه هي أنواع الجيبسوم بورد المتاحه و ألوانها و الفروق بينها و اكسسورات و طرق التركيب و التشطيب و خطوات الإستلام.

هنتعلم تنفيذ الأسقف المعلقة ببلاطات الأرمسترونج الجبسية و هنفهم الفروق بينها و بين الجيبسوم بورد حسب متطلبات الشغل.

بند العزل

هنعرف أشهر الخامات و التقنيات المستخدمه في أعمال عزل الرطوبة و المياة و الحرارة و الصوت.

بالنسبة لعزل الرطوبة و المياة هندرس العزل بالبيتومين الساخن و البارد و هنعرف الفروق بينهم و الفرق بين العزل العادي و المؤكسد و إزاي بيتم تنفيذ بند عزل الأساسات و مباني قصة الردم و رقاب الأعمدة بالبيتومين و هنعرف الفرق بين العزل الموجب و العزل السالب.

هنعرف إيه هو العزل بشرائح الميمبيرن أو الأنسومات و أنواعها و مواصفاتها المختلفة من حيث السمك و التسليح و إزاي بيتم تثبيت الميمبرين بالبشبوري و إزاي بيتم تجهيز الأسطح للعزل و عمل رقبه الإزازة و طرق حماية العزل الأفقي و الرأسي باللياسة الأسمنتيه و مباني جماية العزل و ألواح الكارتونال

هندرس مع بعض العزل الكيماوي و الأسمنتي و استخداماته و تنفيذه و استلامه

هنتعلم يعني إيه حرامية عزل و يعني إيه بخبخة و أشهر عيوب و مشاكل العزل و إزاي بيتم استلام العزل و اختباره.

هنعرف إزاي نقدر نحدد نوع خامة العزل الأمثل حسب مواصفات الشغل و متطلباته

هنعرف إزاي نقدر ننفذ عزل الأسطح و الحمامات و الأرضيات و الحوائط و حمامات السباحة و الخزانات و البدرومات و هنفهم طريقه عزل الحوض المقفول لمنع أي تسريب بالمنشآت المائية

هندرس عزل الحرارة و الصوت بالطرق المختلفة و هنعرف يعني إيه خرسانة سكريت و بربقه و خرسانة ميول و طبقات تشطيب الأسطح و الخرسانة الرغويه و إستخدامات ألواح الفلين المضغوط و الفوم و البولي يوريثان و الصوف الصخري و الزجاجي في أعمال العزل و إزاي نقدر نعزل المبنى عزل حراري و صوتي للحوائط و الشبابيك و الأسقف و الأرضيات

بند الصحي

هندرس أعمال السباكة صرف و تغذيه و هنعرف الفروق بين المواسير المستخدمه و أنواعها و مواصفات و خصائص مواسير البولي بروبيلين و مواسير الـ upvc و طرق لحامهم و تثبيتهم بالمكواه و باللحام و بالجوانات، و هنتعلم و نفهم تفاصيل شبكات المواسير الداخليه للمبنى و إزاي بيتم تنفيذها و إستلامها و هنعرف مسميات القطع الخاصة للسباكة و استخداماتها و إزاي نحصر الخامات اللي محتاجينها

هنتعلم المناسيب و المقاسات و الأقطار الخاصة بالسباكة للأجهزة المختلفة و هنعرف إزاي بيتم إستلام السباكة بدقه و كيفيه عمل إختبارات كبس ضغط المواسير تجنباً لحدوث تسريب

هنتعرف على كل أنواع و خامات و أشكال مستلزمات السباكة للتأسيس و التشطيب

هنعرف و نفهم الفروق بين البيبه و الجاليتراب و الجرجوري و غرفة التفتيش و المطبق و البيارة و الترنش و المانهول و وظيفهتهم.

بند الكهرباء

هنتعلم إزاي بيتم تنفيذ بند الكهرباء بمراحله المختلفة من تمديدات خراطيم الأسقف و الليات و تثبيت خراطيم و مواسير الحوائط و تثبيت العلب و البواطات و اللوحات و سحب السلك و تركيب اللقم و الشاسيهات و تشطيب الوشوش و المخارج، و هنتطرق لشرح التكييف و التيار الخفيف زي التليفون و الإنتركم

هنعرف العلاقات بين مراحل تنفيذ بند الكهرباء و باقي البنود زي النجارة و الحدادة و المباني و البياض و التشطيب.

بند التكسيات

هندرس في بنود التكسيات أعمال السيراميك و البورسلين و الرخام و الجرانيت و الأحجار الأرضيات الباركية و الـ HDF و الفينيل و الأرضيات الإيبوكسية

هنعرف الفرق بين السيراميك و البورسلين و أشهر ماركاتهم و طرق تركيب الحوائط و الأرضيات بالمونة التقليديه و بمون اللصق الجاهزة، و هنتعلم إزاي نجهز رسومات الشوب درووينج للسيراميك قبل التنفيذ و إزاي نحدد نقطة البداية و أماكن الغلايق و هنعرف أكتر من 10 طرق مختلفة لرص البلاطات و إزاي نظبط السيراميك بكل طريقة

هنتعلم إزاي بيتم تنفيذ بند السيراميك و البورسلين و إزاي نستلمهم بشكل صحيح و بدقه و نراجع الوزنات و التربيع و الزوي.. إلخ، و هنتعلم طريقة الصلايب في التركيب و إزاي بيتم ضبط اللحامات و السقيه

هنعرف الفرق بين الرخام و الجرانيت و هنتعرف على أنواعهم المختلفة و مسمياتهم و الفروق بين المصري و المستورد، و طرق التركيب العادية و الميكانيكية و إزاي بيتم تركيب رخام الحوائط و الأرضيات و رخام السلالم و رخام المعابر و الجلسات و الطبانات

هنعرف أنواع مختلفة من الأحجار و استخداماتها و طرق تركيبها و استلامها زي الحجر الفرعوني و الهاشمه و البازلت و الطوب الحراري و الحجر المايكا.

هندرس الحجر الصناعي و خطوات تنفيذه و تشطيبه و معالجته و كيفية إستلامه

هنتطرق لشرح الأرضيات الخشبية (الباركية) بطريقه العلفة و الفلصة و الباركيه الدوكش و هنعرف مزايا و عيوب الأرضيات الباركيه و طريقه تنفيذها و تشطيبها و خطوات استلامها

هنشرح بند الأرضيات الـ HDF و أنواعها و مواصفاتها و طريقه تنفيذ البند و استلامه و إيه أهم مزايا النوع ده من الأرضيات و عيوبه.

هنعرف إيه هي الأرضيات الفينيل و استخداماتها و طريقه التركيب و الإستلام.

درس الأرضيات الإيبوكسية و الميتاليك إيبوكسي و طريقة تنفيذها و استلامها و إيه مزاياها و عيوبها و تطبيقاتها و إزاي نقدر ننفذ بيها أرضيات 3D

بند النجارة

عرف على أنواع الأخشاب المختلفة و هنتعلم إزاي نقدر نفرق بينها من الشكل و الملمس و اللون، و هنعرف مزايا و عيوب و خصائص و استخدامات كل نوع

لم إزاي بيتم تصنيع و تركيب الأبواب و الشبابيك الخشبية و طرق التنفيذ و التثبيت المختلفة و طريقه الحلق الزفر و طريقه التثبيت بحقن الفوم، و هنشرح اكسسوارات التركيب و تثبيتها و إزاي نقدر نستلم أعمال النجارة للأبواب و الشابيك و إيه التفاصيل اللي لازم ناخد بالنا منها

نعرف إزاي نختار بين الأبواب العموله أو الأبواب الجاهزة المحلية و المستوردة و إزاي نفرق بين الأبواب الماسيف و الأبواب الملزوقه قشره

هنتعلم إزاي بيتم دهان الأعمال الخشبية بأنواع الدهان المختلفة و الفرق بين دهانات اللاكية و دهانات الأستر و إزاي نختار بينهم و إزاي نستلمهم

بند الألوميتال

هنتعلم إزاي بيتم تصنيع و تركيب و دهان قطاعات الألوميتال و الفروق بين القطاعات المختلفة و الإكسسوارات الخاصة بالتركيب و الزجاج و السلك بأنواعهم المختلفة و إزاي نقدر نستلم بند الألوميتال بدقه، و إيه هي دهانات الإلكتروستاتيك أو دهانات الفرن

بند حديد الكريتال

هنعرف إزاي بيتم أعمال التصنيع و التركيب لأعمال حديد الكريتال و الحديد المشغول (الفورفورجيه) و طرق التركيب و أنواع الدهان المختلفة و خطوات الإستلام للعناصر المختلفة من أسوار و أبواب و حديد حماية و درابزين و كوبستات.

بند القرميد

هنتعلم كل تفاصيل تركيب و استلام البند و طرق تركيبه المختلفة بالشاسيهات المعدنية أو العلفة الخشبية و الفرق بين أنواع الشقف المختلفة و أشكالها و مسمياتها.

بند الدهانات

هندرس الدهانات الخارجية و الدهانات الداخلية و هنتعرف على أنواع مختلفة من خامات الدهانات منها البلاستيك و الزيت و الدهانات الأسمنتية زي الجرافياتو و السافيتو و هنعرف إزاي نختار خامة الدهانات المناسبة حسب متطلبات الشغل.

هنتعلم خطوات تنفيذ أعمال النقاشه من مراشمه و سيلار و معجون و بطانة و تلقيط و تشطيب و هنعرف إزاي نستلم كل مرحلة.

هنعرف إزاي بيتم عمل الدهانات الديكورية (الأسبونج) و إزاي بيتم تثبيت و لصق ورق الحائط و طريقة استلامه.

البنود الديكورية

خلال الكورس هنتطرق لشرح بنود كتير هتساعدنا في أعمال التشطيب زي الكرانيش الفيوتك و الطوب الزجاجي و الكوريان و الـGRC و الـ GRP و الـ GRG و الـ CNC و الـ HPL و المارموكس بورد و الأسقف الفرنسية… إلخ