كورس التنفيذ (خرسانات) – online

المحاضر م . عبدالرحمن الشرنوبي

السعر شامل لينك لتحميل فيديوهات الكورس

وبرنامج التشغيل – خدمة الدعم الفنى – شهادة اتمام الكورس

EGP1200 EGP800

Sale!
Loading...

محتوى الكورس

المرحلة التمهيدية

في البداية هنفهم إيه هي الشركات المختلفة اللي بتتعاون مع بعض لتنفيذ المشروع و هنعرف دور و مسئوليات و صلاحيات كل شركة تحديداً، هنفهم الفرق بين المالك و الإستشاري المصمم و جهة الإشراف و المقاول العام و مقاولي الباطن و هنعرف العلاقات بينهم خلال فترة المشروع.

هنتعرف على كل مستندات المشروع اللي بيستلمها مهندس التنفيذ و إزاي تفهم المستندات دي و تستخرج منها الـ Data اللي هتحتاجها، و هنفهم إيه هي مقايسة المشروع و مواصفات المشروع و العقد و تقرير الجسة… إلخ. و هنعرف الفرق بين لوحات المشروع المختلفة و مين المسئول عن إعدادها زي لوحات الـ Tender Drawings و لوحات الـ Shop Drawings و لوحات الـ As Built Drawings

هنتعلم مع بعض إيه هي مرحلة الـ Mobilization للمشروع و إيه أهم الإحتياطات اللي لازم نراعيها خلال تنسيق و تجهيز الموقع و إزاي بيتم تحديد أماكن المنشآت المؤقته من كرافانات و مخازن و مناطق تشوينات.. إلخ.

مرحلة الأعمال الترابية و أعمال المساحة 

و دي تعتبر أول مراحل تنفيذ المشروع فعلياً و اللي من خلالها هنتعلم إزاي نتعامل مع الأجهزة المساحية المختلفة و إيه تحديداً دور قسم المساحة في المشروع و إيه الفرق بين الأجهزة المساحية.

هنتدرب بشكل عملي على إستخدام ميزان القامة و تطبيقاته المختلفه في الموقع في إستلام جميع البنود و هيكون معانا ميزان قامة خلال جميع المحاضرات خاص بالتطبيق.

هنعرف إزاي نعاير الميزان و نظبط الأفقيه ليه بشكل سريع جداً و إزاي نقرا قرايات القامة بدقة متناهيه و نحسب كل الحسابات اللازمة لتحديد المناسيب و الإرتفاعات و لضبط المناسيب.

هنفهم الفرق بين الرفع المساحي و التوقيع المساحي بالتفصيل لكل مرحلة.

هنتعلم إزاي بيتم توقيع إحداثيات أركان المشروع و حدود الملكية للمشروع و إزاي بيتم ربط المشروع بالروبير الثابت و بالصفر المعماري و هنفهم الفرق بين الروبير و الصفر المعماري والشرب.

هنعرف إيه هي الميزانية الشبكية و أهميتها و إزاي بيتم تنفيذها بالموقع باستخدام ميزان القامة.

هنعرف إزاي نقرا لوحة الـ Lay Out للمشروع و أهميتها.

هنفهم إيه هي الجسات اللي بيتم عملها للمشروع و توقيت و طريقه تنفيذها و إستلامها، و هنعرف الفرق بين أنواع الجسات المختلفة سواء جسات إسترشادية أو جسات تأكيدية و هنفهم يعني إيه تقرير الجسة و توصيات إستشاري التربة و إيه أهم البيانات اللي لازم نراعيها في تقرير الجسة.. و هنعرف إزاي بيتم تحديد عدد و عمق و أماكن الجسات بالمشروع.

هنعرف إيه المقصود بالأعمال الترابية للمشروع و هنفهم بالتفصيل إزاي بيتم تنفيذ كل بند من بنود الأعمال الترابية.

هنفهم تفاصيل تنفيذ و إستلام بنود الحفر و الردم و الإحلال و التسويات و الدمك و سند جوانب الحفر و نزح المياة الجوفية و هنعرف إيه هي المعدات اللي بيتم إستخدامها في كل مرحلة و الفروق بين المعدات المختلفة و مسمياتها، كمان هنتعلم كل الإختبارات اللي بيتم عملها في الموقع أثناء تنفيذ بنود الحفر و الردم و الإحلال و إيه أهم الإحتياطات الواجب مراعاتها.

هنتعلم تنفيذ بند الخوازيق و الفرق بين الخوازيق الساندة و الخوازيق الحاملة و خوازيق الإرتكاز و خوازيق الإحتكاك و طرق تنفيذهم و إستلامهم و إمتى نستخدم ماكينة الاستراوس أو ماكينة CFA و إزاي بيتم الحفر و التسليح و صب الخوازيق و إيه هو البنتونايت و إستخداماته و إيه هي الإختبارات اللي بيتم عملها للخوازيق المنفذه.

هنفهم يعني إيه هامات و يعني إيه Pile Cap و إيه هي الـ Struts و وظيفة كل عنصر منهم، و ليه بيتم تكسير رؤوس الخوازيق بعد الصب، و إيه المقصود ببيت العمود.

مرحلة الخرسانات 

هنتكلم خلال المرحلة دي عن كل مايخص تنفيذ أعمال الخرسانات بكل بنودها و تفاصيلها للعناصر الخرسانية المختلفة.

هنعرف إيه هي الأخشاب اللي بنستخدمها في الموقع في تنفيذ بند النجارة المسلحة و مسمياتها و إزاي تقدر تحصر كمية الخشب اللي هتحتاجها لتنفيذ الشدة الخشبية للعناصر المختلفة بدقة و بطريقة سريعة.

هنتعرف على العدة و الأدوات اللي بيستخدمها النجارين في الموقع و هنعرف مسمياتها و استخداماتها و إزاي النجار ممكن يسلمنا شغل غلط، و هنتعرف كمان على كل أنواع الموازين المختلفة اللي بيستخدمها النجار زي ميزان الخيط و الشاغول و ميزان الزنبة و ميزان المياة و ميزان الخرطوم.. و هنتدرب بشكل عملي على إستخدام كل أنواع الموازين و نعرف إزاي يتم معايرتها في الموقع.

هنتطرق لشرح تفاصيل تنفيذ و إستلام الخنزيرة و القواعد العادية و القواعد المسلحة و السملات و الأعمدة و الحوائط الساندة و الشير وول و الأسقف بأنواعها المختلفة سواء Solid Slab أو Flat Slab أو H.B .

خلال مرحلة تنفيذ الخنزيرة أو الريجة للمبنى هنفهم إزاي بيتم تنفيذها بدقة و توقيع محاول المبنى من اللوحة على الطبيعة و علاقة الخنزيرة بالنقاط المساحية و الحالات الخاصة لتنفيذ الخنزيرة و إزاي بيتم ضبط منسوبها و أفقيتها و استقامة أضلاعها و تقويتها و إزاي بيتم ظبط تربيع و زوي الخنزيرة و إزاي كمهندس موقع تقدر تستلمها بدقة و بسرعة.

هنتعلم إزاي بيتم تنفيذ نجارة القواعد العادية و المسلحة سواء منفصلة أو مشتركة أو قواعد شريطية أو لبشة و هنفهم إزاي النجار بيوضب القواعد بشكل سليم و إزاي تقدر تستلم نجارة القواعد في الموقع.

هنعرف الفروق بين الميدة و السمل و الشداد و حالاتهم المختلفة.

هنتعلم يعني إيه حطات الأشاير للأعمدة و إيه علاقة مقاسها بمقاس قطاع العمود، و ليه إستلام الحطات يعتبر من أهم الإستلامات في المبنى.

هنتدرب على الطرق الدقيقه و الطرق السريعة لإستلام أعمال نجارة القواعد العادية و المسلحة و السملات.

هنبدأ بعد كدة في مرحلة نجارة الأعمدة.. و هنعرف إيه هي مراحل تنفيذ نجارة الأعمدة من تخشيب و تحطيط و تجليد و تقويه و هنفهم إيه هي القوايم و البرندات و النهايز و الحطات و الأحزمة و إزاي بيتم ضبط مناسيب صب الأعمدة بدقة.

هنعرف إزاي نستلم بند نجارة الأعمدة لجميع الأدوار و إزاي نضبط أماكن و اتجاهات و مقاسات و وزنات الأعمدة و هنتعلم إزاي نصفي لوحات الأعمدة و نحسب المسافات البينية بين الحطات بره بره و جوه جوه و بره جوه و هنفهم يعني إيه حطات ثابته و حطات عيره و إزاي بيتم شد خيوط أكسات مساعدة تساعدنا في الإستلام بسرعة.

هنعرف الفروق بين الشدة المصري و الشدة السورية.

هنتعلم إزاي بيتم تنفيذ نجارة الحوائط الخرسانية و إزاي بيتم تقويتها بالزراجين و الشكالات، و هنعرف إيه هي أنواع الزراجين و الفروق بينها و إمتى يتم إستخدام الزرجينة البلدي أو الزرجينة الأفرنجي و إيه هي الزرجينة المائية و إمتى نستخدمها.

هنبدأ نتعلم تنفيذ و إستلام نجارة الأسقف و هنعرف إزاي بيتم ضبط منسوب و أفقية و إرتفاع السقف، و هنفهم إيه هي العرقات و الحمالات و التطاريح و الشكالات و الشنابر و دورها في الشدة الخشبية، و هنتعلم إزاي نستلم كل تفصيله من تفاصيل نجارة الأسقف بدقة متناهية من تربيع و زوي و أفقيه و تقويات و منسوب.

هندرس تنفيذ و إستلام نجارة السلالم بأشكالها و تصميماتها المختلفة و إزاي نقدر ننفذها بدقه و هنعرف إيه هي أشهر المشاكل اللي بتحصل أثناء تنفيذ نجارة السلالم، و هنعرف إزاي نرسم قاطع للسلم نوضح فيه المناسيب و الإرتفاعات المختلفة و هنفهم إيه هي نقطة الساحق و شاحط السلم و السلمة الكدابة و إزاي نحدد إرتفاع بادي السلم و تقسيط الدرج، و إزاي نقدر نظبط مقاسات القوايم و النوايم لقلبات السلم.

هنبدأ نتعلم تنفيذ و إستلام بنود حديد التسليح و أعمال الحدادة للعناصر الخرسانية المختلفة، في البداية هنعرف إزاي نستلم حديد التسليح المورد للموقع و إزا بيتم تعتيقه و تشوينه و إيه أهم الإحتياطات اللي لازم نراعيها عشان نحافظ على حديد التسليح في الموقع من الصدأ و التلف و من التهدير وهنعرف إزاي بيتم قراءة لوحات التسليح لكل العناصر أساسات و أعمدة و أسقف و إزاي نقدر نفرد لوحات حديد التسليح و نحسب القطعيات و نوفق مقاساتها و إزاي بيتم حصر كميات حديد التسليح، و هنعرف إيه هو الـ BBS لحديد التسليح و إزاي نجهزه.

هنتعلم إزاي بيتم تنفيذ حدادة الأساسات المنفصلة و المشتركة و الشريطية و اللبشة و السملات و الميدات و الشدادات و الأعمدة و الكور و الشير وول و الحوائط الساندة و الأسقف السوليد و الفلات سلاب و الهولوبلوك، هنعرف إزاي نقدر نحدد إتجاهات الفرش و الغطاء لحديد التسليح لكل عنصر و إزاي بيتم وضع الحديد الإضافي للأسقف و اللبشة و إزاي نقدر نحدد أماكن و أطوال الوصلات وفقاً للكود المصري.

هنعرف الفرق بين طول الوصلة و طول الركوب و طول التماسك و طول الرباط، و إيه الأماكن اللي ماينفعش نوصل فيها حديد التسليح و إمتى نعمل وصلات تبادلية و إيه الحالات اللي بنضطر فيها لزيادة طول الوصلات.

هندرس الطرق المختلفة لتسليح الكمرات و البلاطات سواء طريق الكابات أو طريقة المكسحات و تفاصيل كل طريقة.

هنعرف يعني إيه فواتير و مشاطيف و برندات و شوك و مكسحات و تكريب و كرافته و مقص في الحديد، و هنعرف إزاي ننفذ كل علاقات حديد التسليح المختلفة زي تهبيط الحمامات و تهبيط اللبشة و حديد السلالام و الكمرات المقلوب و الساقطة و المدفونه و علاقتها مع البلاطات و الأعمدة، هنتعلم أسس كل تفاصيل الحديد وفقاً للكود المصري و دليل التفاصيل الإنشائية.

هنعرف الأشكال المختلفة للكانات زي الكانة الصندوق و الحباية و الأوتوماتيك و الكانة العيون و الكانة الشدش و الفروق بينم و استخداماتهم، و هنعرف إزاي نقدر نستلم أعمال الحدادة المنفذة بشكل مظبوط.

هنعرف إزاي بيتم تزريع حديد التسليح في حالات ترحيل الأشاير و إمتى نلجأ للتزريع، و هنتعلم إزاي بيتم تغيير قطاع العمود أو اتجاهه و إزاي يتم تقليل أبعاد القطاع.

هندرس أنواع مختلفة من الشدات زي الشدات المعدنية بأنواعها و الشدات المنزلقه و الشدات النفقيه.

هنتعلم إزاي بيتم صب الخرسانات في الموقع بالتفصيل و إيه هي الإحتياطات الواجب مراعاتها قبل الصب و أثناء الصب و بعد الصب.

هنتعلم صب الخرسانة بالخلاطة النحلة و وإزاي بيتم ضبط نسب مكونات الخرسانة و تحديد كميات التشوينات و مواصفاتها و إزاي بيتم متابعه عمال الفورمجية و عمال الطبلية أثناء الصب، و هنتعلم الصب بالخرسانة الجاهزة بالـ Pump و هنعرف إيه اللي لازم نخلي بالنا منه في إستلام الخرسانة المورد للموقع.

هنعرف إزاي بيتم ضبط جودة الخرسانة أثناء الصب و إيه الإختبارات اللي بيتم عملها و إزاي بيتم أخذ المكعبات و اختبار الـ Slump و إزاي بيتم هز و دمك و درع و تخشين و مس الخرسانات.

هنعرف إيه هي المشاكل المتكرره الحدوث أثناء صب الخرسانات و إزاي نتلافاها و إيه هو التعشيش و التسويس و التكريش و إزاي نمنع حدوثهم و إزاي نعالجهم.

هنعرف ليه أحياناً سطح الخرسانة بيظهر فيه شروخ بعد الصب و أسبابها و خطورتها و طرق علاجها، و هنتعلم إزاي نحسب زمن فك الشدات الخشبية و الفرم لجميع العناصر الخرسانية وفقاً للكود المصري.

هنعرف إيه هي إضافات الخرسانة اللي بيتم إستخدامها و فايدتها و نواع الأسمنت و الركام المختلفة و الفروق بينها، و هنعرف إيه التصرف الصح اللي المفروض يتعمل في حالة فشل اختبار تكسير المكعبات و إيه الإختبارات اللي بنلجأ لها في الحالة دي، و هنتعرف على أنواع مختلفة من الخرسانات الخاصة.

هنتعلم إزاي بيتم معالجة الخرسانة بعد الصب بشكل سليم لتحقيق الإجهاد المستهدف و إزاي بتتم المعالجة في حالة عدم توافر مياة بالمشروع.

هنفهم إيه هي الأسباب اللي ممكن تؤدي لإنهيار الشدات الخشبية أثناء صب الخرسانة و إزاي نتلافى حدوث ده تماماً باحتياطات مسبقه.

هنعرف احتياطات صب الخرسانة تحت الماء و أثناء المطر.

هنتعلم طرق و مواصفات صب الأرضيات الخرسانية سواء دكة أرضية أو بلاطات خرسانية و هنعرف يعني إيه خرسانة ميول و بنستخدمها في إيه و إزاي نصبها و إزاي نصب البلاطات المايله زي رامبات الجراجات و إزاي بيتم صب خرسانة القباب، و هنعرف يعني إيه فرشة نضافة خرسانية و إمتى نستخدمها.

هندرس الأنواع المختلفة من الفواصل في المنشآت الخرسانية و هنعرف الفروق بين فاصل الصب و فاصل الهبوط و فاصل التمدد و فاصل الإنكماش و الفواصل الزلزالية و إزاي بيتم تنفيذ كل نوع منهم.

هندرس انواع مختلفة من الأنظمة الإنشائية الخاصة زي الـ Prestressed Concrete سواء Post tension أو pre tension و الـ Pre cast Concrete .

هندرس كيماويات البناء اللي بيتم إستخدامها في الموقع و هنعرف الفروق بين الجراوت و الأديبوند و الإيبوكسي و إستخداماتهم و تطبيقاتهم في الموقع.

شهادة الكورس

شهادة معتمدة من الاكاديمية

مُدة استخدام الكورس

مدي الحياة

المُدة الزَمنية

24 ساعة

عدد المُحَاضرات

94  فيديو مسجل

عبد الرحمن الشرنوبى

محاضر الكورس 

م. عبدالرحمن الشرنوبى

– مهندس مدني إنشائي خريج قسم الهندسة المدنية | جامعة عين شمس 2012
– حاصل على شهادة إدارة المشروعات PMP من معهد PMI الأمريكي
– خبرة عملية 8 سنوات في تخصصات التشييد المختلفة بشركات المقاولات و المكاتب الإستشارية الكبرى.- مهندس إشراف بالمكتب الإستشاري “حسين صبور” للإستشارات الهندسية بعدة مشروعات كبرى بالعاصمة الإدارية الجديدة.
– مؤسس قناة متخصصة و متميزة في هندسة التشييد على يوتيوب و اشتهر بحلقات “ومضات”
– حاصل على دورات تدريبية إحترافية في إعداد المحاضرين TOT
– محاضر متخصص في شرح دورات التنفيذ و إدارة المواقع، و له عدة مؤلفات متميزة في هندسة التشييد و البناء.